Հայաստանում կխթանվի կուտակիչ կայանների ստեղծումը

Կառավարություն առաջարկվում է էներգետիկայի բնագավառում լիցենզավորման ևս մեկ տեսակ ավելացնել. խոսքը պահեստավորման լիցենզիայի մասին է: Այդ մասին ասել է տարածքային կառավարման և ենթակառուցվածքների նախարար Դավիթ Խուդաթյանը։

Նման լիցենզիա ունեցող անձանց կտրվի լիցենզիայով սահմանված տարածքում էներգիա պահեստավորելու հնարավորություն: Միաժամանակ կտրվի մեծածախ շուկայում էլեկտրական էներգիա գնելու և վաճառելու հնարավորություն և շուկայի մասնակիցներին պահեստավորման ծառայություն մատուցելու իրավունք:

Լիցենզավորման ենթակա չի լինի մինչև 1 մեգավատտ հզորությամբ պահեստավորող կայանում էներգիայի պահեստավորումը, ինչպես նաև 1 մեգավատտից ավելի հզորությամբ կայանում բացառապես սեփական կարիքների համար էլեկտրաէներգիա պահեստավորելու գործունեությունը։

2026 թվականի մարտի 1-ի դրությամբ արևային կայանների հզորությունը Հայաստանում հասնում է 1141 մեգավատտի, որից 479 մեգավատտն արդյունաբերական արևային կայաններն են, 662 մեգավատտն ինքնավար տանիքներին տեղադրված արևային կայաններն են: Բացի այդ, ընթացքի մեջ են 170 մեգավատտ՝ նախկինում տրված լիցենզիաներ, որոնք առաջիկայում պետք է կառուցվեն:

Աղբյուրը՝ news.am

Պատկերը՝ Tetra Tech