Կրթաթոշակ

Դասընթացների մասնակիցների համար սահմանվել է անվանական կրթաթոշակ ի պատիվ Հայաստանի Հանրապետության վաստակավոր մանկավարժ, բժշկական քոլեջների ուսանողների համար նախատեսված դասագրքերի հեղինակ, արհմիութենական գործիչ, միջնակարգ բժշկական կրթության կազմակերպիչ Ռիմա Խաչատրյանի։

Մասնակցելու իրավունք

Կրթաթոշակ ստանալու համար դիմելու իրավունք ունեն միայն Հայաստանի Հանրապետության և Արցախի քաղաքացիները, Սիրիայի և Լիբանանի հայերը:
 
Կրթաթոշակ ստանալու առաջնահերթություն ունեն հետևյալ դիմորդները՝
  • սահմանամերձ շրջանների բնակիչները,
  • ծնողազուրկ դիմորդները,
  • ՀՀ կառավարության սոցիալական ապահովության ծրագրերում ընդգրկված դիմորդները,
  • սիրիահայերն ու լիբանանահայերը:

Ինչպես դիմել

Կրթաթոշակ ստանալու համար դիմելիս անհրաժեշտ է առցանց ներկայացնել համապատասխան հայտը և 3x4 սմ չափերով լուսանկար:
 
Ձեզ կտրվեն հարցեր Ձեր կրթության և մասնագիտական ​​կարիերայի, ուսումնական պլանների և Մասնագիտական վերապատրաստման և կատարելագործման ինստիտուտն ընտրելու պատճառների մասին։ Սահմանված ժամկետում պատրաստեք հիմնավորված պատասխաններ, քանի որ կրթաթոշակները կտրամադրվեն մասնագիտական և ակադեմիական նվաճումների և պատշաճ լրացված դիմումների հիման վրա։

Կրթաթոշակի տրամադրման պայմանները

  1. Կդիտարկվեն միայն պատշաճ լրացված դիմումները, որոնց կցված կլինեն բոլոր անհրաժեշտ փաստաթղթերը։
  2. Կրթաթոշակները շնորհվում են՝ հաշվի առնելով դիմորդի մասնագիտական​​ և ակադեմիական արժանիքները:
  3. Կրթաթոշակների քանակը սահմանափակ է, դրանք տրամադրվում են ըստ առկայության։ Նույնիսկ եթե թեկնածուն համապատասխանում է կրթաթոշակի տրամադրման չափանիշներին, կրթաթոշակը կարող է չտրամադրվել։
  4. Դիմորդները կգնահատվեն յուրաքանչյուր ծրագրի համար սահմանված գնահատման չափանիշների համաձայն։
  5. Դիմորդներից կարող են պահանջվել լրացուցիչ տեղեկություններ։ Անհրաժեշտության դեպքում դիմորդը կարող հրավիրվել հարցազրույցի։
  6. Կրթաթոշակները տրվում են այն դիմորդներին, ովքեր համապատասխանում են դասընթացի ծրագրի պահանջներին։
  7. Կրթաթոշակի տրամադրումը կարող է լինել շարունակական, եթե դիմորդը հաջողությամբ կատարում է յուրաքանչյուր դասընթացի ուսումնական պահանջները և պահպանում է ծրագրի կանոնները։
  8. Կրթաթոշակ ստացողները համաձայնվում են դառնալ Մասնագիտական վերապատրաստման և կատարելագործման ինստիտուտի դեսպաններ և ձեռնարկել կրթաթոշակ ստացողի կողմից ողջամիտ և ընդունելի համարվող գործողություններ՝ պատասխանել ապագա ուսանողների հարցումներին, գրել կարճ հոդվածներ, ԶԼՄ-ներին ու բլոգերներին թույլատրել օգտագործել կրթաթոշակ ստացողների լուսանկարներն ու տվյալները և այլն։
  9. Դասընթացն ավարտելուց հետո երկու տարվա ընթացքում ինստիտուտը պարբերաբար կապ է հաստատելու կրթաթոշակ ստացողների հետ՝ պարզելու, թե կրթաթոշակն ինչպես է ազդել նրանց մասնագիտական գործունեության վրա:
  10. Կրթաթոշակներ չեն տրամադրվում այլ զեղչերի կամ հատուկ գնառաջարկների հետ համատեղ։ Կրթաթոշակների վերաբերյալ Մասնագիտական վերապատրաստման և կատարելագործման ինստիտուտի որոշումները վերջնական են:

Ռիմա Խաչատրյան

Կենսագրություն

Ռիմա Խաչատրյանը ծնվել է 1938թ. ապրիլի 3-ին Երևանում՝ Վանից (մայրը) և Ալաշկերտից (հայրը) գաղթածների ընտանիքում։ Ծնողները ծանոթացել էին Ալեքսանդրապոլի ամերիկյան որբանոցում:
 
Մայրական պապը՝ Վանի վիլայեթի Հայոց Ձորի գավառի Անգղ գյուղի քահանա, միաժամանակ, տեղի ուսումնարանի տեսուչ Տեր Գևորգը, 1915թ. եղեռնից մազապուրծ՝ գաղթել է Միացյալ Նահանգներ, ուր 1924թ. զոհվել է ավտովթարից։
 
Աշխատանքային գործունեությունը  սկսել է 1961թ.՝ որպես տեխնիկ-նորմավորող։ 1965թ. սեպտեմբերի 1-ից մինչև իր կյանքի վերջը (55 տարի անընդմեջ) աշխատել է Երևանի հենակետային բժշկական քոլեջում (մինչև 1991թ. Երևանի պետական բազային բժշկական ուսումնարան)։

Կրթությունը

1943-1954 – Երևանի Ստեփան Շահումյանի անվան թիվ 1 միջնակարգ դպրոց:
 
1955-1960 – Երևանի Խ.Աբովյանի անվան հայկական պետական մանկավարժական ինստիտուտ:
 
1965 – ավարտել է Հայկական պետական գյուղատնտեսական ինստիտուտը:
 
1969 – ստացել է Երևանի Կարլ Մարքսի անվան պոլիտեխնիկական ինստիտուտին կից միջնակարգ մասնագիտական կրթության դասատուների որակի բարձրացման ֆակուլտետի դիպլոմ «Քիմիա» մասնագիտությամբ։
 
2013 – ավարտել է մասնագիտական կրթության և ուսուցման զարգացման ազգային կենտրոնի կողմից կազմակերպված՝ «Արդյունքի ձևավորմանը միտված ուսումնական ծրագրերով ուսումնառության կազմակերպում և իրականացում» թեմայով վերապատրաստման դասընթացը։

Մանկավարժական գործունեությունը

1965-2020 – Երևանի հենակետային բժշկական քոլեջ, անալիտիկ, անօրգանական, օրգանական և դեղագործական քիմիայի դասախոս։
 
2002-2014 – Երևանի հենակետային բժշկական քոլեջ, դեղագործության ամբիոնի վարիչ։
 
1984 – երկարամյա բարեխիղճ աշխատանքի համար Հայկական ԽՍՀ Գերագույն Խորհրդի Նախագահության հրամանագրով պարգևատրվել է «Աշխատանքի վետերան» մեդալով։
 
1987 – Համամիութենական սոցիալիստական մրցության արդյունքներով արձանագրած բացառիկ նվաճումների համար արժանացել է ԽՄԿԿ կենտկոմի, ԽՍՀՄ մինիստրների խորհրդի, ՀԱՄԿԽ-ի ու ՀամԼԿԵՄ Կենտկոմի պատվոգրի։
 
2017 – ՀՀ Նախագահի հրամանագրով Ռիմա Խաչատրյանին շնորհվել է Հայաստանի Հանրապետության վաստակավոր մանկավարժի պատվավոր կոչում։

Դասագրքերը

  1. «Անօրգանական քիմիա», ուսումնական ձեռնարկ բժշկական քոլեջների ուսանողների համար, մաս I, «Լաքի փրինթ» հրատարակչություն, Երևան 2007
  2. «Անօրգանական քիմիա», ուսումնական ձեռնարկ բժշկական քոլեջների ուսանողների համար, մաս II, «Լաքի փրինթ» հրատարակչություն, Երևան 2007
  3. «Անալիտիկ քիմիա», ուսումնական ձեռնարկ բժշկական քոլեջների ուսանողների համար, «Լեգալ պլյուս» հրատարակչություն, Երևան 2009
Դասագրքերն արդեն մեկուկես տասնամյակ ներառված են Հայաստանի պետական բժշկական քոլեջների ուսումնական ծրագրերում որպես հիմնական ուսումնական ձեռնարկներ։

Միջնակարգ բժշկական կրթության կազմակերպումը

1970-1996 – գործուն մասնակցություն է ունեցել բժշկական քոլեջների հանրապետական ցանցի ընդլայնմանը։
 
2002 – բժշկական միջնակարգ կրթության ոլորտում ներդրած մեծագույն ավանդի, բազմամյա ծառայության և աշխատանքային գնահատելի հաջողությունների համար  պարգևատրվել է ՀՀ առողջապահության նախարարության պատվոգրով։
 
2009 – ՀՀ նախագահի հրամանագրով միջնակարգ բժշկական կրթության համակարգի զարգացման գործում ունեցած նշանակալի ավանդի համար պարգևատրվել է «Անանիա Շիրակացու» մեդալով:

Արհմիութենական գործունեությունը

1969-2020 – Երևանի հենակետային բժշկական քոլեջ, արհմիության (շուրջ 5000 անդամ) նախագահ:
 
1981-1989 – բուժաշխատողների արհմիության Մյասնիկյանի շրջանային կոմիտեի փոխնախագահ։
 
1984-1986 – բուժաշխատողների արհմիության Մյասնիկյանի շրջանային կոմիտեի նախագահ։
 
1980-2020 –Հայաստանի բուժաշխատողների արհմիության հանրապետական կոմիտեի, ապա առողջապահության աշխատողների արհեստակցական կազմակերպությունների հանրապետական միության խորհրդի անդամ:
 
1992-1994 – կիրառել է «արհմիության գանձարանը՝ փոխօգնության դրամարկղ» սկզբունքը, երբ յուրաքանչյուր ամիս հավաքված անդամավճարներն ամբողջությամբ բաշխվում էին այն ուսանողների ու աշխատակիցների միջև, որոնց ընտանիքներում կար արցախյան պատերազմի մասնակից։
 
1987 – պարգևատրվել է ԽՍՀՄ արհմիությունների համամիութենական խորհրդի պատվոգրով։
 
1996 – նրա ակտիվ մասնակցությամբ ընդունված «Բնակչության բժշկական օգնության և սպասարկման մասին» օրենքում առաջին անգամ արծարծվեցին բուժքույրական գործունեության իրավական կարգավորման, միջին բուժանձնակազմի աշխատանքային ծանրաբեռնվածության գնահատման ու աշխատանքի արդար վարձատրության ապահովման հիմնահարցերը։
 
2008 – պարգևատրվել է Հայաստանի արհմիությունների կոնֆեդերացիայի պատվոգրերով։
 
2017 – պարգևատրվել է Արհմիությունների համընդհանուր կոնֆեդերացիայի հուշամեդալով։

Պարգևներ

  1. Հայաստանի Հանրապետության վաստակավոր մանկավարժի պատվավոր կոչում (ՀՀ Նախագահի 2017թ. մայիսի 17-ի N ՆՀ-388-Ա հրամանագիր)
  2. «Անանիա Շիրակացու» մեդալ (ՀՀ Նախագահի հրամանագիր ՆՀ-123-Ա,  26.05.2009թ.)
  3. Հայաստանի Հանրապետության Վարչապետի հուշամեդալ (ՀՀ վարչապետի որոշում, N 291-Ա, 27.03.2018թ.)
  4. ՀՀ կրթության և գիտության նախարարության հուշամեդալ (ՀՀ կրթության և գիտության նախարարի հրաման N503-Ա, 26.09.2005թ.)
  5. «Աշխատանքի վետերան» մեդալ (Հայկական ԽՍՀ Գերագույն Խորհրդի նախագահության հրամանագիր N 1378, 22.03.1984թ.)
  6. Արհմիությունների համընդհանուր կոնֆեդերացիայի հուշամեդալ (Արհմիությունների համընդհանուր կոնֆեդերացիայի գործադիր կոմիտեի որոշում N 10-14, 21.06.2017թ.)