Դոկտոր Լորենցո Լոտտին Լոնդոնի համալսարանական քոլեջի տնտեսագետ է։ Իր գիտական հետազոտություններում նա կենտրոնացած է էներգետիկայի և բնապահպանության ոլորտներում վարքագծային տնտեսագիտության ազդեցության խնդիրների վրա։ Դոկտոր Լոտտին ստացել է Ջենովայի Համալսարանի տնտեսագիտության բակալավրի, Պավիայի համալսարանի միջազգային տնտեսագիտության մագիստրոսի և Լոնդոնի համալսարանական քոլեջի կիրառական տնտեսագիտության դոկտորի գիտական աստիճան։ Զարգացման տնտեսագիտության ասպարեզում դոկտոր Լոտտին աշխատել է Ուգանդայում և Հնդկաստանում։ Ներկայում աշխատում է Լոնդոնի համալսարանական քոլեջի Բարտլեթթ դպրոցի ներգետիկայի և շրջակա միջավայրի տնտեսագիտության և քաղաքականության մագիստրատուրայում որպես ծրագրի ղեկավար և ավագ դասախոս, ինչպես նաև Բարձրագույն կրթության ակադեմիայի գիտական աշխատող է։

Դոկտոր Ռեյնաուերը Էներգետիկ քաղաքականության և բնապահպանության մագիստրոսական ծրագրի կրտսեր դասախոս է եղել Լոնդոնի համալսարանական քոլեջում։ 2013-2014 թվականներին, նշյալ ծրագրի իրականացման առաջին իսկ ուսումնական տարում, ստացել է մագիստրոսի աստիճան։ 2014-2018 թվականներին աշխատել է որպես նույն ծրագրի կրտսեր դասախոս։ 2019-ին ստացել է դոկտորի գիտական կոչում՝ պաշտպանելով Թաիլանդի բիոգազային արդյունաբերության ոլորտի փոքր և միջին ձեռնարկությունների շրջանում տեխնոլոգիական հմտությունների խնդիրներին նվիրված իր ատենախոսությունը։ Դոկտոր Ռեյնաուերի գիտական հետաքրքրությունների շրջանակն ընդգրկում է ցածր և միջին եկամուտ ունեցող երկրներում տեխնոլոգիական նորարարության, սոցիալ-տնտեսական զարգացման և կլիմայի փոփոխության մեղմման ոլորտներում իրականացվող քայլերի համադրության խնդիրները։ 2019 թվականից, որպես Մարիա Սկլոդովսկա-Կյուրիի անվան կրթաթոշակառու, գիտական հետազոտություններ է իրականացնում Կոպենհագենում (Դանիա):

Դիանան կառավարման, մարքեթինգի, թվային մարքեթինգի, վաճառքի և բիզնեսի այլ ոլորտների գծով դասախոս և բիզնես-խորհրդատու է։ Մորգան քոնսալթինգ Արմենիա ընկերության հիմնադիրն է, որը մասնագիտացած է մարքեթինգի բնագավառում խորհրդատվությունների և ուսուցման ոլորտում։ Ունի մարքեթինգի բնագավառում գործարար կառավարման մագիստրոսի գիտական աստիճան (Հայաստանի ամերիկյան համալսարան)։ Դասավանդում է Հայաստանի ամերիկյան համալսարանի բիզնեսի և տնտեսագիտության քոլեջում։ Ավելի քան 15 տարի աշխատել է Միացյալ Նահանգների Միջազգային զարգացման գործակալությունում, ուր մասնագիտացած էր տուրիզմի և տեղեկատվական տեխնոլոգիաների ոլորտի ձեռնարկությունների զարգացման և մրցակցային առավելությունների ձևավորման բնագավառում։

Կարեն Արաբյանը ստացել է Հայաստանի պետական ճարտարագիտական համալսարանի էներգետիկ տնտեսագիտության մագիստրոսի և Օքսֆորդի համալսարանի ֆինանսական ռազմավարության մագիստրոսի աստիճան։ Որպես խորհրդատու աշխատակցել է մի շարք հայկական և միջազգային մասնավոր ընկերությունների, պետական գործակալությունների և միջազգային ֆինանսական կազմակերպությունների, ինչպիսիք են Վերակառուցման և Զարգացման Եվրոպական Բանկը, Համաշխարհային Բանկը, Գերմանիայի Զարգացման Բանկը և այլն։ Կարեն Արաբյանը էներգետիկ արդյունավետության և վերականգնվող էներգետիկայի ոլորտում ծրագրերի իրականացման, ներդրումային նախագծերի մշակման, ֆինանսական վերլուծությունների, փորձագիտական խորհրդատվության և քաղաքականության զարգացման մեծ փորձ ունի ։ Ներկայում Ամբեր կապիտալ մասնավոր ներդրումային հիմնադրամի գլխավոր օպերացիոն տնօրենն է։

Սուրեն Թաթիկյանը Հրազդանի ջերմային էլեկտրակայանի աշխատանքի անվտանգության և լեռպետհսկողության ավագ տեսուչն է, տեխնիկական գիտությունների թեկնածու, միաժամանակ, դասավանդում է Հայաստանի ազգային պոլիտեխնիկական համալսարանում։ 1972 թվականից իր աշխատանքային գործունեության ընթացքում հեղինակել է նորարարական ու արդյունավետության բարձրացման պատենտավորված վեց օգտակար մոդել, ներառյալ շոգեգազային ցիկլով 200 ՄՎտ հզորությամբ գազային տուրբինները։ Պարոն Թաթիկյանը նախագծել է պտտվող մասերի փոքրացված տրամագծով հողմային տուրբին, որը հնարավորություն է տալիս հողմային կայաններում կրճատել սարքավորումների տեղափոխման և տեղադրման ծախսերը, նվազեցնում է աղմուկն ու վիբրացիան, արդյունքում՝ պակասեցնելով նաև դրանց բացասական ազդեցությունը շրջակա միջավայրի վրա և արտադրական ծախսերը կրճատելով 20%-ով։ Այս նորարարության համար 2015թ. նա արժանացել է «Բարձրացնելով բիզնեսի արդյունավետությունը, կայունությունն ու շրջակա միջավայրի հանդեպ հոգատարությունը» թեմայով մոսկովյան միջազգային կոնֆերանսի առաջին մրցանակին։

Որպես Ծրագրի ղեկավար Քրիստինան մեր թիմին միացել է 2019 թվականին։ Արևելյան Եվրոպայի առաջնակարգ վերլուծական կենտրոններից մեկի՝ Մարդկային զարգացման միջազգային կենտրոնի փորձագետի պաշտոնում նա որակական հետազոտությունների բնագավառում ավելի քան 15 տարվա փորձառություն ունի։ Նրա գիտահետազոտական հետաքրքրությունները ներառում են կրթական քաղաքականության բնագավառը՝ առանձնահատուկ ուշադրություն կենտրոնացնելով միջնակարգ կրթությանը, ուսուցիչների մասնագիտական վերապատրաստմանը, քաղաքականության փոխակերպումներին, շարունակական ուսուցմանը ու քաղաքացիական կրթությանը ։ Քրիստինան նաև վերապատրաստման դասընթացների ուսումնական ծրագրերի պատրաստման և կառավարման մեծ փորձ ունի։ Ուսուցման տեսության և դասավանդման մեթոդաբանության, արդյունավետ հաղորդակցության և հասարակական ընկալումների ձևավորման բնագավառներում բազմաթիվ ուսումնական ծրագրեր է կազմել և իրականացրել Հայաստանում և Վրաստանում։ Ստացել է Լոնդոնի համալսարանական քոլեջի շարունակական կրթության կազմակերպման առանձնահատկությունների կառավարման, ինչպես նաև Հայաստանի ամերիկյան համալսարանի անգլերենի՝ որպես օտար լեզվի դասավանդման մագիստրոսի գիտական աստիճան։

Գուանյու Յանը ստացել է Պեկինի միջազգային համալսարանի միջազգային տնտեսագիտության մագիստրոսի և Քեմբրիջի համալսարանի բնապահպանական քաղաքականության մագիստրոսի աստիճան։ Նա դոկտորական թեզ է պատրաստում Լոնդոնի համալսարանական քոլեջի էներգետիկայի ինստիտուտում։ Ներկայում ուսումնասիրում է վարքագծային խթաններ Չինաստանում գրասենյակային օդակարգավորումը էկոլոգիապես մաքուր դարձնելու նպատակով, աշխատում է Լոնդոնի համալսարանական քոլեջի «Էներգետիկա, մարդիկ և վարքագիծ» մագիստրատուրայում՝ որպես դասախոսի օգնական։ Գուանյույի գիտական հետաքրքրությունների շրջանակը ներառում է վարքագծային տնտեսագիտությունը, բնապահպանական վարքագիծը և էներգիայի օգտագործման ոլորտները։

Աննա Մարտիրոսյանը Եվրասիա միջազգային համալսարանի «Կառավարման և ՏՏ» ամբիոնի վարիչն է։ Նա ունի Լոնդոնի համալսարանական քոլեջի տնտեսագիտության մագիստրոսի կոչում։ Աշխատում է իր ատենախոսության վրա, որն իրականացնում է Իսպանիայի Սանտյագո դե Կոմպոստելայի համալսարանի «Տնտեսագիտության» ամբիոնում: Նա նաև Տուշիայի համալսարանի «Կառավարման և շրջանաձև տնտեսության» կրկնակի դիպլոմի մագիստրոսական ծրագրի ակադեմիական համակարգողն է: Բացի այդ նա համակարգում է Էրազմուս+ SIN-NEC ծրագիրը, հանդիսանում է Գիտության և տեխնոլոգիաների եվրոպական համագործակցության (COST) Action LIAISE-ի կառավարման կոմիտեի անդամ և իր կարիերայի ընթացքում մասնակցել է ԵՄ կողմից ֆինանսավորվող տարբեր նախագծերի, այդ թվում՝ Էրազմուս+ CBHE T-Green, ARMDOCT, Covenant of Mayors East II և EU4 Armenia’s Sustainable Energy Project և այլն։

Հովհաննես Թևոսյանը «Էներջի Սիստեմս» ՍՊ Ընկերության գործադիր տնօրենն է։ 2011-2014 թթ. պարոն Թևոսյանը ստացել է Ֆ․մ.գ.թ. գիտական աստիճան Ռուս-Հայկական (Սլավոնական) պետական համալսարանում մաթեմատիկայի և բարձր տեխնոլոգիաների բնագավառում։ Մագիստրոսի կոչումը ստացել է ՀՌՀ-ի ֆիզիկայի և տեխնոլոգիաների ֆակուլտետում։ Նրա կողմից իրականացված հետազոտություններն ուղղված են վերականգնվող էներգիայի, ՎԷ կանոնակարգերի, էներգաարդյունավետության, այլընտրանքային էներգիայի ուսումնասիրմանը: Հ. Թևոսյանն աշխատել է կանաչ էներգիայի զարգացման ոլորտում տարբեր նախագծերի վրա, ինչպիսիք են՝ Նավոյի 220 ՄՎտ ՖՎ կայանի (Ուզբեկստան), Նամանգանի 250 ՄՎտ ՖՎ կայանի (Ուզբեկստան), Սիսիանի 36 ՄՎտ հզորությամբ հողմային էլեկտրակայանի (Հայաստան), Արագածոտնի 25 ՄՎտ հզորությամբ ՖՎ կայանի նախագծում ու ճարտարագիտություն։

Չառլի Էդմոնդսն ավարտել է Քեմբրիջի համալսարանը: Նրա մագիստրոսական թեզը նվիրված է արդյունաբերական ճարտարապետության արդի խնդիրներին և ուսումնասիրում է Տոկիոյում առաջադեմ և քաղաքային ճարտարապետության հարաբերակցությունը: Որպես հետազոտող Չառլին աշխատել է Կիոտոյի Համալսարանի TeamLab-ի աշխատակիցների լայն շրջանակի հետ: Չառլիի հետազոտությունները գլխավորապես ուղղված են նոր մեթոդների բացահայտմանը, որոնց միջոցով քաղաքային ճարտարապետությունը կարող է նպաստել կայուն զարգացմանը և անհավասարության դեմ տարվող պայքարին